7.000 МЛАДИ КРАПОВИ ПУШТЕНИ ВО ПРЕСПАНСКОТО ЕЗЕРО: Обновен рибниот фонд

Рибниот фонд на Преспанското Езеро е дополнет со околу 7.000 млади крапови, откако денеска во езерските води беше пуштен еден тон подмладок. Младите единки се добиени од икра на матици од самото езеро, а порибувањето го спроведе регистрираното мрестилиште „Акватика“ од Неготино. За реализацијата се обезбедени 500.000 денари од Министерството за земјоделство, шумарство и водостопанство преку Програмата за финансиска поддршка во рибарството и аквакултурата за 2026 година.

Инспектори ја контролираа акцијата за порибување во Преспанското Езеро

Инспектори од Државниот инспекторат за земјоделство го следеа процесот, при што ја контролираа вкупната тежина на подмладокот и бројот на единки пуштени во езерото. Министерот Борче Серафимовски истакна дека со акцијата се поддржува обновата на локалната популација на крап и најави продолжување на вложувањата во рибниот фонд и заштитата на биодиверзитетот.

Најавени засилени контроли против незаконски риболов

Директорот на Државниот инспекторат за земјоделство, Ивица Ангеловски, најави засилени контроли на Преспанското Езеро и продолжување на соработката со риболовните здруженија. Целта, како што посочи, е навремено откривање и спречување на незаконскиот риболов и заштита на рибниот фонд.