ЕСЕНТА ПОЧНА СО МИНУСИ: Во Берово измерени -2 степени, на Попова Шапка нула

Календарската есен започна со студено утро во делови од Македонија, при што температурите паднаа под нулата. Во Берово утрово се измерени -2 степени, додека на Попова Шапка температурата била 0 степени. Најтопло утро имало во Гевгелија, каде што се измерени 12 степени, додека во Скопје температурата изнесувала 7 степени.

Студено утро, но сончево попладне

И покрај ниските утрински температури, во текот на денот се очекува претежно сончево време со мала до умерена локална облачност. Ќе дува слаб до умерен ветер, претежно од северозападен правец, а дневните температури ќе се движат од 18 до 25 степени. Во Скопје максималната температура ќе достигне 23 степени.

Голема температурна разлика

Разликата меѓу утринските и дневните температури ќе биде значителна, особено во местата каде утрото започна со минусни температури. Според прогнозата, стабилното и сончево време ќе продолжи, но студените утра се показател дека постепено пристигнува постудениот период од годината.