ФЗО ПОЈАСНИ: На вработените во МВР вратени на работа по судска одлука здравственото осигурување се активира автоматски

Нема технички проблем во системот

Фондот за здравствено осигурување појасни дека состојбата со здравственото осигурување на дел од вработените во МВР не е резултат на технички проблем или застој во системот. Според ФЗО, станува збор за лица кои се вратени на работа врз основа на судски одлуки, но за дел од нив во моментот нема евидентирана соодветна уплата на придонесите за претходниот период. Фондот објаснува дека при дополнително пријавување вработени за претходен период потребно е да се направи корекција на пресметката на платата и да се доплатат придонесите. По евидентирањето на уплатата, здравственото осигурување се активира автоматски.

ФЗО и МВР во координација

Од ФЗО нагласуваат дека не станува збор за индивидуална административна одлука или рачно исклучување на осигурениците, туку за системски и автоматизиран механизам кој важи за сите правни субјекти. Во моментов претставници на Фондот и Министерството за внатрешни работи се во директна координација за спроведување на потребните постапки и надминување на состојбата. Од Фондот апелираат институциите навремено да ги спроведуваат корекциите и уплатите при дополнително пријавување вработени, особено кога тоа се прави врз основа на судски одлуки. На тој начин, како што посочуваат, ќе се избегнат ситуации во кои привремено може да биде засегнат статусот на здравственото осигурување.